Geloof in Jesus het nie net te doen met idees en oortuigings nie. Nadat ek my geloof in Jesus geplaas het om my te red, begin 'n lewe van volgelingskap en groei.  

 

Al die inhoud op Eden Gemeente se  Volgende Tree webwerf gaan inderdaad oor volgelingskap en groei, maar in hierdie spesifieke afdeling dink ons in breë trekke oor die beginsel van volgelingskap.

​

Christenskap is die geloof in beide Jesus se lewe en dood. Die Here wat vir jou gesterf het, het ook vir jou geleef. Johannes sê dit is Jesus se léwe wat jou lig is.

 

Geloof is 'n denkwoord en 'n doenwoord. Toe jy Jesus aangeneem het, het jy 'n sekere oortuiging gekry, 'n manier van dink, naamlik dat Jesus jou lewe kan verander, dat Hy jou kan vergewe en jou lewe ewige betekenis kan gee.

 

Met jou eerste oorgawe het jy gekies om God toe te laat om jou deur sy woord en deur sy Gees te help om reg te dink. Hierdie keuse moet jy oor en oor in jou lewe maak.

​

Hoe meer jy reg dink, hoe meer gee jy ook jou manier van lewe oor om aan te pas by hoe Jesus self geleef het op aarde. 

 

Die twee opdragte van Jesus, “Glo in My” en “Volg my,” kan nooit van mekaar geskei word nie. Só praat die skrif hieroor:

​

In Hom was lewe, en die lewe was die lig van die mense. (Joh 1:4)

​

En Hy sê vir almal: As iemand agter My aan wil kom, moet hy homself verloën en sy kruis elke dag opneem en My volg. Want elkeen wat sy lewe wil red, sal dit verloor; maar elkeen wat sy lewe om My ontwil verloor, hy sal dit red. (Luk 9:23-24)

 

In hierdie afdeling volg leesmateriaal en videos oor volgelingskap en groei.